Erməni terrorunun canlı şahidi Bəxtiyar: “Evimizə bomba düşəndə qorxmadım, heç kişi də qorxar?” - FOTO/VİDEO

Erməni terrorunun canlı şahidi Bəxtiyar: “Evimizə bomba düşəndə qorxmadım, heç kişi də qorxar?” - FOTO/VİDEO
11 Okt 2021 17:41


Keçən il oktyabrın 11-də Ələkbər bəy Rəfibəyli küçəsində insanlar gecəni dəhşət və ölümlə qarşıladılar. Təxminən saat 10 radələrində Ermənistanın raket hücumu nəticəsində 10 nəfər həlak oldu, 30-dan çoxu isə yaralandı. Faciə yerindən dünyaya Ermənistanın dinc əhaliyə terrorunu əks etdirən dəhşətli görüntülər yayılırdı. Dünya bu kadrlarla yanaşı, sifəti qan içində olan 6 yaşlı balaca Bəxtiyarın təbəssümündə həm də Azərbaycan xalqının sınmaz iradəsini, mərdliyini gördü. Balaca Bəxtiyar sanki erməni vəhşiliyinə təbəssümü ilə cavab verirdi, Azərbaycan xalqının qorxmaz iradəsini göstərirdi.

AZƏRTAC-ın bölgə müxbiri balaca Bəxtiyarla görüşüb, o dəhşətli günləri onun ailəsinin, özünün dilindən bir daha dinləyib.

Gəncənin balaca qəhrəmanı Bəxtiyar Heydərli hər gün gəlib evlərinin dağıntılarını seyr edir. Yanmış, sınmış oyuncaqlarını, qonşularını, balaca dostlarını axtarır...

“Evimizə bomba düşəndə qorxmadım. Heç kişi də qorxar? Bacımın yanına getdim. Dedim ki, ay Şəhla, qorxma mən yanındayam. Onun qorxudan ayaqları tutulmuşdu, iki gün yeriyə bilmədi. Ermənilər bizim evimizi dağıdıb, onlara nifrət edirəm”, - deyə erməni terrorunun 6 yaşlı şahidi həmin günləri xatırlayır.

Bəxtiyarın anası Lalə Heydərova həmin günlər barədə həyəcansız danışa bilmir:

“Ayın 4-ü, 5-i, 8-i atılan bütün raket zərbələrini görmüşdük. Oktyabrın 11-i idi. Hamımız yatmışdıq. Qəfil gurultu səsinə oyandıq, yer-göy titrədi. Gözümüzü açanda dağıntılar içində idik. Tez telefonun işığını yandırdım. Elə anda, öz evində belə nəyin harada olduğunu unudursan. Evimiz tanınmaz vəziyyətdə idi. İşığı uşaqların üzərinə salanda gördüm ki, hər şey onların üstünə yıxılıb. Qızımın ayaqları tutulmuşdu, yeriyə bilmirdi. Bəxtiyarın üzü-gözü qan içində idi. Lakin bu vəziyyətdə bacısını qucaqlayıb deyirdi ki, “Şəhla, qorxma mən sənin yanındayam”.

Lalə Heydərova deyir ki, ailəsi təcili tibb yardım və xilasetmə qruplarının köməyi ilə dağıntılar arasından çıxarılıb.

“Bəxtiyarın təcili yardım maşınında gülümsəməsi mənə sanki təpər verdi. Həmin vaxt oğlumdan güc aldım. Bütün dünya onun timsalında xalqımızın əyilməzliyini, mərdliyini gördü. Azərbaycan əsgəri bu qisası yerdə qoymadı, torpaqlarımızı yağı düşməndən azad etdi. Yaşasın ordumuz, yaşasın Prezidentimiz”, - deyə Bəxtiyarın anası bildirib.

Qeyd edək ki, 2020-ci il oktyabrın 11-də gecə saat 2 radələrində Ermənistan silahlı qüvvələri növbəti dəfə Azərbaycanın hərbi əməliyyatların aparıldığı bölgədən uzaqda yerləşən Gəncə şəhərinin mərkəzi hissəsində yerləşən çoxmənzilli yaşayış binalarını qadağan edilmiş “Scud” ballistik raket sistemi ilə atəşə tutub. Nəticədə uşaq, qadın, qocalar da daxil olmaqla, dinc insanlar həlak olub və yaralanıb, çoxsaylı mülki infrastruktur obyektlərinə ciddi ziyan dəyib.

Ermənistan məqsədli şəkildə mülki əhalini hədəf seçməklə beynəlxalq humanitar hüquq normalarını, xüsusilə də Cenevrə Konvensiyasının, “Silahlı münaqişə zamanı mədəni sərvətlərin mühafizəsi haqqında” Haaqa Konvensiyasının müddəalarını, eyni zamanda, 2020-ci il 10 oktyabr tarixində elan edilmiş humanitar atəşkəs rejimini kobud şəkildə pozub.

27 Okt 2021
Siyasət

İlham Əliyev və Rəcəb Tayyib Ərdoğanın birgə mesajları - MÖVQE

“Türkiyə Prezidenti Rəcəb Tayyib Ərdoğanın Füzuliyə və Zəngilana səfərləri çox mühüm tarixi və siyasi hadisədir. Türkiyə liderinin Prezident İlham Əliyevlə birgə Füzuli Beynəlxalq Hava Limanının açılışını etməsi böyük əhəmiyyət kəsb edirdi”.

27 Okt 2021
Siyasət

Əliyev-Ərdoğan görüşü: Türkiyəni qəbul etməyənlərə cavab və Ermənistanın ifşası - TƏHLİL

Türkiyə Prezidenti Rəcəb Tayyib Ərdoğanın Azərbaycana ötən gün baş tutan səfəri növbəti dəfə bütün dünya üçün önəmli mesajlar ehtiva edir. İstər Azərbaycan Prezidenti İlham Əliyevin Türkiyə liderini Füzuli hava limanının açılışına dəvət etməsi, istərsə də Ərdoğanın bu dəvəti məmnuniyyətlə qəbul edib Azərbaycana təşrif etməsi dövlətlərarası münasibətlərdə artıq uzun illərdir formalaşmış birlik və bərabərliyin əyani təzahürü kimi qarşımıza çıxır.

27 Okt 2021
Siyasət

Prezidentdən şəhid ailələri və qazilərlə bağlı FƏRMAN

Prezident İlham Əliyev şəhid və şəhid ailəsi statusu almış şəxslərə, müharibə ilə əlaqədar əlilliyi müəyyən edilmiş şəxslərə və müharibə veteranlarına dair məlumatların mübadiləsi mexanizminin təkmilləşdirilməsi və Azərbaycan Respublikası Prezidentinin 2019-cu il 15 aprel tarixli 634 nömrəli Fərmanı ilə təsdiq edilmiş “Azərbaycan Respublikasının Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sistemi haqqında Əsasnamə”də dəyişiklik edilməsi barədə fərman imzalayıb. 

27 Okt 2021
Siyasət

Qubadlıda icra olunan infrastruktur layihələri dinamik inkişafa hesablanıb - Kamaləddin Qafarov

“Bu gün işğaldan azad edilmiş bütün digər bölgələrimiz kimi, Qubadlı şəhəri və rayonun kəndləri də sürətlə bərpa edilir. 

27 Okt 2021
Siyasət

Zakir Həsənov Hulusi Akarla görüşdü

Türkiyə Respublikasının Prezidenti Rəcəb Tayyib Ərdoğanın Azərbaycan Respublikasına rəsmi səfəri çərçivəsində müdafiə naziri general-polkovnik Zakir Həsənov Zəngilan rayonunda Türkiyənin milli müdafiə naziri Hulusi Akar ilə görüşüb.