Bakı Nəqliyyat Agentliyi (BNA) paytaxtda baş verən yol qəzaları nəticəsində yollarda yaranan tıxacların aradan qaldırılması üçün sürücülərə müraciət edib. Müraciətdə bildirilir ki, yol qəzaları zamanı sürücülər tıxac yaratmamaq üçün avtomobilləri yolun hərəkət zolağından kənara çəkməli, yolda avtomobillərin maneəsiz hərəkətinə şərait yaratmalıdır.
Sürücülər yol polis və sığorta agentliyi əməkdaşlarının hadisə yerinə gələrək baş vermiş qəzanın səbəbini araşdırana qədər avtomobili qəza yerindən kənara çəkməyin qanunsuz olduğunu bilirlər.
Prosesdə sürücü necə hərəkət etməlidir?
BAN-in mütəxəssisləri bildirirlər ki, bununla bağlı məsələ qanunvericilikdə təsbit olunub. Qanunvercilik yol-nəqliyyat hadisəsində zədələnmiş nəqliyyat vasitəsinin məhz hadisə yerində sığortaçıya təqdim edilməsini nəzərdə tutmur. Zədələnmiş avtomobilin konstruksiyasını dəyişilmədən istənilən yerdə bu, həyata keçirilə bilər. "İcbari sığortalar haqqında" qanunun 58.2-ci maddəsində göstərilən hallarda - müvafiq qurumun yol-nəqliyyat hadisəsini təsdiqləyən sənəd hadisə ikidən artıq olmayan avtonəqliyyat vasitəsinin iştirakı ilə baş verdikdə, hadisə nəticəsində sağlamlığa zərər dəymədikdə, dəymiş zərərin həcmi 1000 manatdan çox olmadıqda, hadisənin baş verməsində təqsirli olan şəxsin müəyyən edilməsi üzrə tərəflər arasında mübahisə olmadıqda tələb olunmur.
Nəqliyyat üzrə ekspert Ərşad Hüseynov hesab edir ki, baş verən yol qəzası nəticəsində sürücülər arasında anlaşma olarsa, bu halda sığorta şirkətinin əməkdaşını gözləmədən qəzaya uğramış avtomobilləri hadisə yerindən kənarlaşdırmaq olar:
"Bu məsələ qanunvericilikdə kifayət qədər öz əksini tapıb. Avtomobillər iki növ sığorta edilir. İcbari və kasko, yəni ümumi sığorta. Qanunvericiliyə görə, qəza baş verən zaman sürücü dərhal hadisəni araşdıran orqana, yəni Dövlət Yol Polisinə məlumat verməlidir. "Yol hərəkəti haqqında" Qanunun 37-ci maddəsinə görə, hadisə baş verərkən yol polisi hadisə yerinə gəlməyincə, hadisə yerini tərk etmək qadağandır. Həmin maddəyə görə, bir halda hadisə yerini tərk etməyə icazə verilir. Əgər hadisə zamanı yalnız avtomobillərə maddi ziyan dəyibsə, xəsarət alan və sürücülər arasında mübahisə yoxdursa, qəza yerini təbaşirlə işarələyib hadisənin foto və video çəkilişi aparılmaqla avtomobilləri hadisə yerindən kənarlaşdırmaq olar. Həmin prosesdə sürücülər özləri sənəd tərtib edərək onu hadisə şahidlərinə təsdiqlətdikdən sonra avtomobilləri ərazidən uzaqlaşdıra bilər".
Ə.Hüseynov bildirir ki, bu halda sığortaçı sürücüləri qanunsuzluqda ittiham edə bilməz:
"Əgər hadisə barədə sığorta şirkətinə dərhal məlumat verilibsə, əmlak vəziyyəti dəyişdirilmədən sığortaya qiymətləndirilmək üçün təqdim olunursa, bu prosesdə problem ola bilməz. Məqsəd odur ki, əmlakın vəziyyəti dəyişdirilməsin. Bu halda sığortaçıya hadisə yeri vacib deyil. Hadisə yerinin sığorta şirkətinə aidiyyəti yoxdur, qurum dəymiş ziyanı müəyyənləşdirir. Belə halda sürücü yolda, hadisə yerində sığortaçını gözləməli deyil".
Ə.Hüseynov deyir ki, əmlakın zədəsinin sığorta şirkətinə hadisə yerində təqdim edilməsi qanunda göstərilməyib. Qanuna görə, sığorta şirkətinə əmlakın zədəsi dəyişdirilmədən təqdim edilməlidir:
"Əgər hadisə baş veribsə, sürücü ziyan dəymiş avtomobili evakuator vasitəsilə də zədəni dəyişdirmədən sığorta şirkətinə istənilən yerdə təqdim edə bilər. Sığortaçıya o maraqlıdır ki, avtomobil sahibi onu aldatmasın, avtomobildəki əvvəldən olan zədəni də hadisə baş verən vaxt yaranan zədə kimi təqdim etməsin. Hadisəyə hüquqi qiymət verilməsinin sığortaçıya heç bir aidiyyəti yoxdur. Hüquqi qiymət vermək yol polisi və digər hüquq-mühafizə orqanlarının işidir".
Bu ilin yanvar-fevral aylarında Azərbaycana 7 min 322 ton ət idxal edilib.
Zəlzələlərin tədqiqatı bürosunun məlumatına əsasən, yerli vaxtla saat 12:27-də Gədəbəy stansiyasından 37 km şimal-şərqdə, Şəmkir rayonunda zəlzələ qeydə alınıb.
