Tikinti materialları bazarındakı aşağı aktivlik dəyişə bilər

17 2017 10:44

“Azərbaycanda tikinti materialları bazarında vəziyyət müəyyən qədər sabitdir. Bunun da müəyyən səbəbləri var”.

Bunu Trend-ə Əmlak Ekspert Mərkəzinin direktoru Ramil Osmanlı deyib.

R.Osmanlı bildirib ki, 2016-cı il ərzində idxal tikinti materiallarının qiymətində artımlar olub:

“Bu da manatın məzənnəsində baş verən dəyişikliklərlə bağlıdır: "Ölkəyə idxal olunan taxta, dəmir və dəmir materialları, Rusiyadan, Ukraynadan gətirilən armaturlar, Çindən, Koreyadan, Finlandlyadan gətirilən dam örtükləri, eyni zamanda ayrı-ayrı ölkələrdən gətirilən bəzi materiallarda qiymət artımı müşahidə olunub”.

R.Osmanlı bildirib ki, Azərbaycanda artıq ümumi tikinti materialları portfelində yerli məhsulların payı idxal olunan məhsulları üstələyir: “Yerli məhsulların istehsalı artdıqca, tədricən bəzi idxal məhsulları rəqabətə davam gətirə bilmir və bazardan çıxır. Müşahidələr göstərir ki, alternativi idxal olunmayan əksər yerli məhsulların qiymətində ciddi artımlar yoxdur, hətta bəzi məhsullarda - mişar və ağlay daşında və s. bu cür materiallarda tələbatın azalması səbəbindən qiymət azalması baş verib. Ümumilikdə, 2016-cı il ərzində tikinti materiallarının orta qiymətində artım 16.5 faiz təşkil edib ki, bu da idxal olunan taxta, armatur kimi materialların qiymət artımı ilə bağlıdır. Bu cür materiallar orta qiymətə daha çox təsir göstərir”.

R.Osmanlı əlavə edib ki, il ərzində tikinti materalları bazarında aktivlik aşağı düşüb, materallara olan tələbat azalıb: “2014-cü ildən indiyədək tikinti materiallarına tələbatın azalması müşahidə edlib. Lakin sosial mənzillərin inşası ilə əlaqədar olaraq görülən işlər qarşıdakı aylarda tikinti materialları bazarında müəyyən qədər tələbi artıracaq”.