İran parlamentinin komissiya sədri: Azərbaycanda 2017-ci ilin “İslam Həmrəyliyi İli” elan edilməsi müdrik qərardır

İran parlamentinin komissiya sədri: Azərbaycanda 2017-ci ilin “İslam Həmrəyliyi İli” elan edilməsi müdrik qərardır
31 2017 11:01

Yanvarın 30-da Azərbaycanın İrandakı səfiri Bünyad Hüseynov İslam Şurası Məclisinin (parlamentin) xarici siyasət və təhlükəsizlik məsələləri komissiyasının sədri Əlaəddin Brucerdi ilə görüşüb.

Səfir diqqətə çatdırıb ki, son üç ildə Azərbaycan və İran prezidentləri yeddi dəfə görüşüb, ölkələrimiz arasında münasibətlərin daha da inkişaf etdirilməsində siyasi iradə nümayiş etdiriblər.

Qeyd olunub ki, ötən il iki qonşu və dost dövlətin əlaqələrinin inkişafı davam edib. Dövlət və hökumət nümayəndələrinin qarşılıqlı səfərləri intensiv xarakter daşıyıb. Azərbaycan-İran hökumətlərarası müştərək iqtisadi komissiyanın iclasları keçirilib və birgə iqtisadi layihələrin həyata keçirilməsi müzakirə edilərək konkret nəticələr əldə olunub. Neftçalada avtomobil, Bakının Pirallahı qəsəbəsində isə dərman preparatları zavodlarının əsası qoyulub. Bu istehsal müəssisələrinin işə düşməsi hər iki ölkənin iqtisadi maraqlarına xidmət edəcək.

Vurğulanıb ki, ötən il Naxçıvan-Təbriz-Tehran-Məşhəd dəmir yolu xətti fəaliyyətə başlayıb və yaxın vaxtlarda Astara (Azərbaycan)-Astara (İran) dəmir yolu istifadəyə veriləcək. Bütün bunlar qarşılıqlı faydalı əməkdaşlığın bariz nümunələridir. İki ölkə arasında turizm sahəsində əməkdaşlıq inkişaf edir, bu cür əlaqələr hər iki ölkədə turizm sənayesinin inkişafına böyük təkan verir və xalqların bir-birini daha yaxından tanımasına şərait yaradır. Ötən il iki ölkə arasında ticarət dövriyyəsində 75 faizlik artım müşahidə edilib.

Səfir bildirib ki, Azərbaycanda tətbiqinə başlanılan “ASAN Viza” sistemi ilə İran vətəndaşlarının Azərbaycana səfər etmələri asanlaşıb. Artıq İranın müxtəlif şəhərlərindən Azərbaycana getmək istəyən vətəndaşın viza almaq üçün Azərbaycanın İrandakı diplomatik nümayəndəliklərinə gəlib müraciət etməsinə ehtiyac yoxdur. Hər bir iranlı ölkənin istənilən bölgəsindən internet vasitəsilə viza alıb Bakıya və yaxud başqa şəhərlərə gedə bilər.

B.Hüseynov “Azərbaycan Respublikası Hökuməti və İran İslam Respublikası Hökuməti arasında Ordubad və Marazad Su Elektrik stansiyalarının tikintisi və istismarı haqqında” və “Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində “Xudafərin” və “Qız Qalası” hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında” sazişlərin İran İslam Şurası Məclisi tərəfindən təsdiq edildiyinə görə təşəkkürünü bildirib. Diqqətə çatdırılıb ki, hər iki Saziş üzrə əməli fəaliyyətə başlanılıb.

Ermənistan-Azərbaycan, Dağlıq Qarabağ münaqişəsi haqqında məlumat verən səfir ermənilərin 1992-ci ilin fevralında Xocalıda törətdikləri soyqırımı aktına toxunub. Bildirilib ki, Xocalı soyqırımı ilə bağlı bir sıra ölkələrin parlamentlərində müzakirələr keçirilib, qərar və qətnamələr qəbul edilib. B.Hüseynov dost və qonşu İran parlamentində də Xocalı soyqırımının müzakirəyə çıxarılmasını xahiş edib.

Diplomat 2017-ci ilin Azərbaycan Prezidentinin Sərəncamı ilə “İslam Həmrəyliyi İli” elan olunmasını da diqqətə çatdırıb, bu gün İslam dünyasının vəhdətə və birliyə böyük ehtiyacının olduğunu qeyd edib.

B.Hüseynov cari ilin mayında Bakıda IV İslam Həmrəyliyi Oyunlarının keçiriləcəyini xatırladıb və Ə.Brucerdini bu Oyunlara baxmağa dəvət edib.

Ə.Brucerdi Azərbaycan Prezidentinin 2017-ci ili “İslam Həmrəyliyi İli” elan etməsini müdrik və uzaqgörən qərar adlandırıb. İki ölkənin qarşılıqlı əməkdaşlıq əlaqələrinin inkişafını müsbət qiymətləndirən komissiya sədri Azərbaycan xalqının və dövlətinin əldə etdiyi uğurların sevindirici olduğunu bildirib. Azərbaycan-İran parlamentlərarası işçi qrupunun fəaliyyətindən razı qaldığını deyən Ə.Brucerdi qarşılıqlı əlaqələrin bundan sonrakı inkişafına İran parlamentinin hər zaman töhfə verməyə hazır olduğunu diqqətə çatdırıb.

Görüşdə qarşılıqlı maraq doğuran digər məsələlər ətrafında da geniş fikir mübadiləsi aparılıb.


8 Dek 2021
Dünya

Almaniyanın yeni kansleri seçildi – VİDEO

Almaniya Bundestaqında keçirilən səsvermə nəticəsində sosial demokrat Olaf Şolz Almaniya Federativ Respublikasının yeni kansleri seçilib.

8 Dek 2021
Dünya

Təcrübəli konqresmen vəzifəsini tərk edir

Təcrübəli konqresmen Devin Nunes vəzifəsini tərk edəcək və ABŞ-ın keçmiş prezidenti Donald Trampın yaratdığı sosial şəbəkəyə rəhbərlik edəcək.

8 Dek 2021
Dünya

Rusiya və Çin peyk naviqasiyası üçün yol xəritəsi imzalayıb

Rusiyanın “Roskosmos” dövlət korporasiyası və Çin Peyk Naviqasiya Sistemi Komissiyası 2021-2025-ci illər üçün peyk naviqasiyası sahəsində əməkdaşlıq üçün yol xəritəsini təsdiqləyib.

8 Dek 2021
Dünya

İsveçdə koronavirusa qarşı yeni məhdudiyyətlər tətbiq edilib

Bu gündən İsveçdə əlverişsiz epidemioloji vəziyyətlə əlaqədar olaraq koronavirusa qarşı məhdudiyyətlər tətbiq edilib.

8 Dek 2021
Dünya

İraqda terrorçular məhv edilib

Türkiyə Hərbi Hava Qüvvələri İraqın şimalındakı Hakurk bölgəsində 4 PKK terrorçusunu zərərsizləşdirib.