Hesablama Palatasının növbəti kollegiya iclasında  həyata keçirilmiş üç nəzarət tədbiri üzrə hesabatlar müzakirə olunub. 

Bizimyol.info xəbər verir ki, bunlardan yalnız iki  tədbir barədə məlumat var. Biri Dünya Bankının kreditini cəlb edilməklə həyata keçirilən “Məcburi köçkünlərin yaşayış şəraiti və gəlir imkanlarının dəstəklənməsi” Layihəsi üzrə vəsaitlərin istifadəsinə dair olub. Digəri isə “Azərbaycan Meliorasiya və Su Təsərrüfatı” Açıq Səhmdar Cəmiyyətinin dövlət büdcəsinin “Kənd təsərrüfatı, meşə təsərrüfatı, balıqçılıq, ovçuluq və ətraf mühitin mühafizəsi” bölməsindən maliyyələşən suvarma sistemləri idarələrinin fəaliyyətinin, suvarma suyunun Sudan İstifadəedənlər Birliklərinə (SİB-lərə) və su istehlakçılarına satışının vəziyyətinin təhlilinin nəticələrinə dair nəzarət tədbirləri üzrə hesabatların müzakirəsidir.  

İclasda hər bir nəzarət tədbiri üzrə Kollegiya qərarının layihəsi müzakirə edilərək təsdiq olunub. Həmin qərarların icrasını təmin etmək məqsədilə aidiyyəti dövlət qurumlarına təqdimatların göndərilməsi və audit tədbirlərinin nəticələri barədə məlumatların Milli Məclisə təqdim olunması qərara alınıb. Kollegiya iclasında aparılmış audit tədbirlərinin nəticələri üzrə təqdimatların icrası vəziyyəti barədə auditorların məlumatı dinlənilib, müvafiq qərarlar qəbul edilib.İclasda həmçinin cari məsələlər də müzakirə edilib, müvafiq tövsiyələr verilib.

Palata rəhbərliyi yenə cəmiyyətə şifrəli mesaj göndərib, apardığı audtlərdə ciddi nöqsanlar aşkarladığını MM və aidiyyati dövlət qurumlarına təqdimatdan bəlli edib.