“Microsoft Azerbaijan”da da ixtisarlar olacaq? – AÇIQLAMA

30 2017 13:17

Məlum olduğu kimi, son dövrlər ABŞ-ın texnologiya nəhəngi “Microsoft” üçün işlər yolunda getmir. Bunun nəticəsidir ki, şirkət 2 minə yaxın adamı işdən çıxarıb, yaxında isə 700 nəfəri işdən azad edəcək.

REALPRESS.Az Xəbərlər.az-a istinadən xəbər verir ki, bir müddət əvvəl “Microsoft” strategiya dəyişikliyinə uyğun olaraq, təxminən 3 min adamı işindən çıxaracağını açıqlayıb.

“Microsoft”da işdən çıxarılanların əksəriyyəti mobil sektor üzrə işləyənlər olub.

Ekspertlər də düşünür ki, şirkət mobil bazarda gözlədiyi müvəffəqiyyəti əldə edə bilməyib və bu bazardan imtina edib. İndi isə bütün diqqəti “bulud” texnologiyalarına yönəldib.

Maraqlıdır, görəsən, şirkətin yeni strategiya dəyişikliyi regionlardakı fəaliyyətinə də təsir edəcək?
Hazırda şirkətin ölkəmiz üzrə bölməsi “Microsoft Azerbaijan” fəaliyyət göstərir. Bu kütləvi işdən çıxarmaların Azərbaycana da təsiri ola bilərmi?

“Microsoft Azerbaijan” şirkəti əməkdaşlarının sayını azaltmağı və ya strategiyasını dəyişməyi planlaşdırmır. Biz hər zaman olduğu kimi, “bulud” texnologiyaları sahəsində ölkə üçün prioritet sahələri inkişaf etdirməyə, ən son texnoloji yeniliklərə keçidi təmin etməyə davam edəcək və Azərbaycanda innovasiyanın yüksəlişinə dəstək verəcəyik”, - deyə məsələ ilə bağlı cavab olaraq “Microsoft Azerbaijan”dan bildiriblər.

Qeyd edilib ki, şirkətin Milli İnkişaf Planına uyğun olaraq, əsas priotetlər qısamüddətli hədəf kimi iqtisadiyyatın bütün sahələrində xərclərin səmərəliliyinin artırılması, uzunmüddətli hədəf kimi isə innovasiya yönümlü qeyri-neft sektorunun inkişafı, təhsil sisteminin fərdiləşdirilmiş tədris istiqamətində transformasiyasıdır.