“Ustad” jurnalının yeni nömrəsi işıq üzü görüb

“Ustad” jurnalının yeni nömrəsi işıq üzü görüb
06 Mar 2020 16:54

Ədəbiyyat və sənət jurnalı olan “Ustad”ın 34-cü nömrəsi çap olunub.

Realpress.az xəbər verir ki, bu nömrədə müxtəlif məzmunda araşdırma yazılar, esselər, hekayə və şeirlər, müsahibələr və digər sənət yazıları yer alıb.

Jurnal baş redaktor Şəmil Sadiqin “Teatrımızın dirilişi” yazısı ilə başlayır. Məqalə İlqar Fəhminin “Mənəm, mən...” mistik-psixoloji dramı əsasında YUĞ teatrının hazırladığı tamaşa haqqındadır.

Mədəniyyət və Turizm naziri Əbülfəs Qarayevlə müsahibədə müasir kitabçılıq, mədəni tədbirlər fonunda kitaba maraq, regionlarda kitab oxuma həvəsi və s. haqqında danışılıb.

Filologiya üzrə elmlər doktoru Elnarə Akimovanın Dino Busattinin “Tatar çölü” romanı haqqında yazısı, Səlim Babullaoğlunun “Noyabr gündəliyi” jurnalın bu nömrəsində çap edilib.

Azərbaycan mühacirətinin ən görkəmli nümayəndələrindən olan Süleyman Təkinərin sovet tənqidi haqqında 1959-cu ildə Almaniyada çap olunmuş məqaləsi Azərbaycan dilinə uyğunlaşdırılaraq dərc olunub. Məqalədə sovet tənqidçilərinin Rəsul Rza yaradıcılığına münasibəti qabardılır.

Müasir türk ədəbiyyatından Hakan Bıçakıçının hekayələri AMEA-ın əməkdaşı, filologiya üzrə fəlsəfə doktoru Nərmin Cahangirovanın tərcüməsində oxuculara təqdim edilib.

Azərbaycan bölgələrində son illərdə yaranan ədəbiyyatın janr və forma müxtəlifliyi, toxunular mövzular və s. barədə Nizami Hüseynovun “Bölgələrdə nədən yazılır?” məqaləsində məlumat verilib.

Pərvinin tərcüməsində Aykut Ərtoğrulun “Dünyanın ən qəzəbli hekayəsi”, Camal Şakarın “Bəzən gələcək gəlməz”, Güray Süngünün “İşıqlı baş”, Nəcib Tosunun isə “Balaca Bərivan” hekayələri, Ceylan Mumoğlu tərcüməsində isə Səid Faiq Abasıyanıqın “Açıq səma altında otel” hekayələri jurnalın bu nömrəsində yer alıb.

Kino-resenziya rubrikasında Kamran Şeyxzamanlı Con Lennonun ölümündən bəhs edən “27-ci hissə” filmi haqqında yazıb. Filmdəki “Çovdarlıqda uçurumdan qoruyan” əsəri ilə qəhrəmanın taleyi arasındakı paralellər şərh edilib.

Şeir rubrikasında Emin Pirinin, Orxan Yaşarın və Vasif Zöhraboğlunun şeirləri dərc olunub. Fərid Məmmədovun “Uçmağı öyrənmək” və Uraqanın “Qurban” hekayəsi də oxucuların ixtiyarına verilib. Eyyub Məmmədovun “Finişdən o yandakı həyat” esse-yazısı Salam Sarvan yaradıcılığına həsr olunub.

Jurnalın sənət rubrikasında “Kubizm – inteqrativ sənət” haqqında araşdırma yazı verilib. Rəssamlıqda kubizmin doğuluşu, əsas nümayəndələri və digər sənət sahələrində təzahürü barədə araşdırmanın müəllifi Nizami Hüseynovdur.


25 May 2020
Mədəniyyət

Əbülfəs Qarayevin vəzifəsini kim icra edir? - AÇIQLAMA

“Bəzi kütləvi informasiya vasitələrində Mədəniyyət nazirinin səlahiyyətlərinin nazirin birinci müavininə həvalə olunması barədə yayılan xəbərlər həqiqəti əks etdirmir”

21 May 2020
Mədəniyyət

Vladimir Putin Çingiz Abdullayevi təltif etdi

Rusiya Prezidenti Vladimir Putin Azərbaycan Yazıçılar Birliyinin katibi, detektiv romanların müəllifi Çingiz Abdullayevin “Dostluq” ordeni ilə təltif edilməsi haqqında sərəncam imzalayıb.

15 May 2020
Mədəniyyət

Polad Bülbüloğlunun qardaşı vəfat etdi

Azərbaycan professional vokal sənətinin banisi, görkəmli opera müğənnisi Bülbülün böyük oğlu Çingiz Məmmədov vəfat edib.

3 May 2020
Mədəniyyət

Polad Bülbüloğlu Moskvada “Dostlar üçün axşam” yubileyinə dəvət edir - VİDEO

İctimaiyyətin sevimlisi, SSRİ və Azərbaycanın görkəmli estrada müğənnisi və bəstəkarı Polad Bülbüloğlu pərəstişkarlarını Moskvada bir araya toplayacaq.

23 Mar 2020
Mədəniyyət

Əbülfəs Qarayev: Virtual layihələr də artıq hər kəs üçün əlçatandır

 nazir müraciətində bildirib ki, bu günlər dünyanı cənginə almış koronavirus (COVİD-19) infeksiyası ilə bağlı, bir çox ölkələrdə olduğu kimi, Azərbaycanda da həyati önəm kəsb edən addımlar atılır.