"İranın hücumları Qətərin kritik sənaye infrastrukturuna, o cümlədən Mesaiddəki su anbarlarına və Ras-Laffandakı "Qatar Energy" sənaye kompleksinə yönəldilmişdi".
Oxu.Az xəbər verir ki, bu barədə Qətərin Xarici İşlər Nazirliyinin sözçüsü Məcid bin Məhəmməd əl-Ənsari brifinqdə bildirib.
"Ras-Laffan və Mesaiddə sənaye obyektləri və infrastruktura təsir edən zərbələr qeydə alınıb", - o, əlavə edib.
Diplomat qeyd edib ki, Ras-Laffanda hədəf istismar və xidmət obyektlərini əhatə edən inteqrasiya olunmuş sənaye kompleksi, Mesaiddə isə həyati əhəmiyyətli obyekt və su anbarları olub.
Bazar ertəsi "Qatar Energy" Ras-Laffan və Mesaid şəhərlərindəki sənaye obyektlərinə edilən hücumla əlaqədar sıxılmış təbii qaz (STQ) və əlaqəli məhsulların istehsalını dayandırdığını elan edib. Qətər Müdafiə Nazirliyinin məlumatına görə, bu obyektlər İran ərazisindən buraxılan pilotsuz uçuş aparatlarının zərbələrinə məruz qalıb.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
İran 22-ci raket hücumu dalğasında Fars körfəzindəki ABŞ hərbi bazalarına, Təl-Əviv, Hayfa və Ben-Qurion hava limanındakı İsrail ordusunun obyektlərinə hücum edib.
ABŞ və İsrailin İran ərazisinə endirdiyi zərbələr nəticəsində mülki şəxslər arasında ölənlərin sayı 1 332 nəfərə çatıb.
Yaxın Şərqdəki münaqişənin daha da kəskinləşməsi fonunda qızılın və gümüşün qiyməti yenidən yüksəlib.
