“Yüzlərlə texnika, minlərlə insan sürətli quruculuq işlərinə cəlb olunub. Necə ki hərbçilərimiz böyük fədakarlıqlar, qəhrəmanlıqlar göstərib qısa zamanda torpaqlarımızı işğaldan azad ediblər, eyni fədakarlıqla da inşaatçılarımız çalışırlar”.
Vətən Müharibəsi Azərbaycanın qələbəsi ilə başa çatdıqdan dərhal sonra işğaldan azad olunan ərazilərin mina və partlamamış döyüş sursatlarından təmizlənməsinə başlanıldı. Bunun ardınca rayon, şəhər və kəndlərin bərpası prosesinə start verildi. İlk növbədə yol infrastrukturu quruldu. Qısa müddətdə Şuşa şəhərinə Zəfər yolu çəkildi, digər yaşayış məntəqələrini birləşdirəcək yeni yolların, həmçinin hərbi təyinatlı yolların inşasına başlanıldı.
Genişmiqyaslı bərpa layihələrinin uğurla icra edilməsi üçün elektrik, su təchizatı məsələlərinin həlli istiqamətində mühüm işlər görülüb. Şuşa şəhərində bir sıra obyektlərin istifadəyə verilməsi ilə paralel olaraq Vaqif Poeziya Günləri, Xarıbülbül Musiqi Festivalı keçirilib. Füzuli, Zəngilan, Laçın rayonlarında beynəlxalq hava limanlarının tikintisinə başlanılıb. Qarabağın giriş qapısı sayılan Füzulidəki aeroport cəmisi 8 aya hazır vəziyyətə gətirilib, təyyarə reyslərini qəbul edib. Müzəffər Ali Baş Komandan, Prezident İlham Əliyev və Birinci vitse-prezident Mehriban Əliyevanın Ağdam, Kəlbəcər, Laçın, Füzuli, Xocavənd, Hadrut, Cəbrayıl, Şuşa, Suqovuşan səfərlərində bəzi yaşayış məntəqələrinin baş planlarının təqdimatı olub. Ölkə başçısı və birinci xanım ictimaiyyət nümayəndələri ilə birlikdə yeni infrastruktur layihələrin, o cümlədən “ağıllı kəndlər”in, müasir çoxmənzilli binalardan ibarət yeni yaşayış məhəllələrinin təməlini qoyublar.
Bütün bunlar Qarabağ və ətraf rayonların əzəli sahiblərinin öz torpaqlarına qayıtdığını, Azərbaycan Prezidentinin rəhbərliyi altında işğaldan azad olunan ərazilərin sürətlə yenidən qurulduğunu, bərpa edildiyini nümayiş etdirir. Ölkə başçısının vurğuladığı kimi, qalib və qürurlu Azərbaycan xalqı bundan sonra bu torpaqlarda əbədiyyən yaşayacaq. Füzuliyə səfəri çərçivəsində rayon ictimaiyyəti ilə görüşən Prezident İlham Əliyev bu barədə danışarkən qeyd edib ki, azad edilmiş bütün torpaqlarda həyat bərpa olunacaq, vətəndaşlar tezliklə öz doğma ocaqlarına qayıdacaqlar. Onun sözlərinə görə, indiyə qədər təməli qoyulan layihələr bizi hədəflərimizə doğru daha da yaxınlaşdırır:
“Müharibə artıq tarixdə qaldı, Dağlıq Qarabağ münaqişəsi də tarixdə qaldı, biz gələcəyə baxmalıyıq. Bu gün biz gələcəyi yaradırıq, öz əllərimizlə yaradırıq. Əminəm ki, bütün planlarımız - bu günə qədər bəyan edilən bütün hədəflər necə təmin edilmişdisə, növbəti dövr üçün nəzərdə tutulmuş hədəflər də təmin ediləcək. Biz bu hədəflərə çatacağıq, ölkəmizi gücləndirəcəyik, ordumuzu yenə də gücləndirəcəyik və Azərbaycan xalqının təhlükəsiz həyatını təmin edəcəyik. Əlbəttə ki, 30 il ərzində əziyyət içində, o cümlədən mənəvi əzab içində yaşamış köçkünləri, maksimum qısa müddət ərzində öz doğma torpaqlarına qaytaracağıq”.
Dövlət başçısının Ağdam və Füzuli rayonlarının ictimaiyyət nümayəndələri ilə görüşlərində iştirak edən millət vəkili Aqil Abbas “Kaspi” qəzetinə açıqlamasında deyib ki, işğaldan azad olunan bütün rayonlar, o cümlədən Ağdam geniş tikinti meydançasını xatırladır, sürətli quruculuq, bərpa işləri həyata keçirilir. Deputatın sözlərinə görə, işlərin bu cür sürətlə gedişi onu deməyə əsas verir ki, məcburi köçkünlər öz ata-baba yurdlarına daha tez qayıda biləcəklər: “Cənab Prezident İlham Əliyevlə Şuşada görüşəndə qısa söhbət etdik. O, Ağdama gedib-getmədiyimi soruşdu. Bu söhbətdən sonra ailə üzvlərimlə birlikdə iki dəfə Ağdama getdim. Orada görülən işlərlə yerində tanış oldum. Cənab Prezidentlə Füzulidəki görüşümüz zamanı ona Ağdamda gördüklərim barədə ətraflı məlumat verdim. Ağdamda sürətlə həm dördzolaqlı, geniş avtomobil yolu çəkilir, həm də dəmiryolu. Demək olar ki, hər iki layihə yekunlaşmaq üzrədir. Yüzlərlə texnika, minlərlə insan sürətli quruculuq işlərinə cəlb olunub. Necə ki hərbçilərimiz böyük fədakarlıqlar, qəhrəmanlıqlar göstərib qısa zamanda torpaqlarımızı işğaldan azad ediblər, eyni fədakarlıqla da inşaatçılarımız çalışırlar. Ağdam qaynayır. Şəhərdə gözəl bağ salınıb, Prezidentin xüsusi nümayəndəliyinin, tikinti təşkilatlarının ofisləri hazırlanıb. Bütün bunlar barədə dövlət başçısına danışanda o söylədi ki, birlikdə yenə Ağdama gedərik, görülən işlərlə tanış olarıq. Baş verən bu hadisələr, yaradılan, qurulan rayon, şəhər və kəndlər bütün ağdamlılar kimi məni də sevindirir”.
Deputatın qənaətinə görə, işlər belə sürətlə davam edərsə, ağdamlılar 4 il ərzində öz doğma yurdlarına qayıda biləcəklər:
“Kəndlərə qayıdış daha tez baş verəcək. Amma şəhərə qayıtmaq üçün haradasa 4 il lazım gələcək. Çox yüksək səviyyədə böyük tikinti layihələri icra olunur. Təklif edərdim ki, vaxtilə Nadir Abbasov tərəfindən yay aylarında yaradılan və müsbət təcrübə kimi keçmiş SSRİ-yə yayılan tələbə inşaat dəstələri yenidən bərpa olunsun. Tələbə gənclərimiz də azad olunan ərazilərimizin quruculuğunda müəyyən ödəniş müqabilində iştirakçı olsunlar, əldə etdikləri vəsaiti təhsil haqlarına ödəsinlər, yaxud tələbatlarına uyğun xərcləsinlər. Bütün Qarabağ geniş tikinti meydanıdır indi. Tikilən, yenidən qurulan bu şəhərlər, rayon, kənd və qəsəbələr əvvəlki adları ilə adlandırılsa da, onlara ikinci həyat bəxş edən İlham Əliyevin şəhərləri kimi tarixə düşəcəklər”.
Aprelin 25-də Azərbaycan Respublikasının Prezidenti İlham Əliyev və Qırğız Respublikasının Prezidenti Sadır Japarov Ağdam Cümə məscidinin bərpadan sonra açılışında iştirak ediblər.
Azərbaycanda səfərdə olan Qırğızıstan Prezidenti Sadır Japarova Qarabağ atı hədiyyə edilib.
“Azərbaycanda 2019-cu ildən bu günə qədər özəl sektorda 385 mindən çox iş yeri yaradılıb”.
