Azərbaycanda doğulan uşaqların 53,3 faizi oğlanlardır

07 2017 16:51

2016-cı ilin 11 ayının statistikasına görə Azərbaycanda doğulan uşaqların 53,3 faizi oğlanlar, 46,7 faizi isə qızlardır.

Bunu Ailə, Qadın və Uşaq Problemləri üzrə Dövlət Komitəsinin baş məsləhətçisi Aynur Veysəlova AZƏRTAC-a müsahibəsində bildirib. Onun sözlərinə görə, hazırda dünyanın bir sıra ölkələrində aktual problemlərdən biri də doğulan uşaqların cinsə görə nisbətinin pozulmasıdır.

Bu gün Azərbaycanda da belə bir tendensiya özünü göstərməkdədir. Azərbaycanda ailələr oğul övladlarına daha çox üstünlük verirlər. Vəziyyətin getdikcə ağırlaşması konkret tədbirlər görülməsi zərurətini ortaya qoyub. Ailə, Qadın və Uşaq Problemləri üzrə Dövlət Komitəsi də mütəmadi olaraq regionlarda ailə planlaşdırılması və reproduktiv sağlamlıqla bağlı maarifləndirmə tədbirləri həyata keçirir. Bu maarifləndirmə kampaniyalar zamanı əhaliyə cinsi yollarla ötürülən infeksiyalardan, arzuolunmaz hamiləlikdən qorunma yolları, abortun mənfi nəticələri haqqında ətraflı məlumat verilir. Qadınlar özlərini müxtəlif infeksiyalardan qorumalı, abortlara, xüsusilə də selektiv abortlara üz tutmamalıdırlar. Artıq oğlan uşaqlarının qızlara nisbəti 54-46 faizdir. Bu, arzuolunan hal deyil. Məlumdur ki, uşağın cinsi 12 həftənin tamamından sonra bilinir. Onun cinsinə görə məhv edilməsinə isə bundan sonra qərar verilir. Artıq dölün yox, cinsiyyəti məlum olan bir uşağın abortla götürülməsi qadın üçün müxtəlif zərərlərlə nəticələnə bilər. Selektiv abortların ana üçün ilkin mənfi təsiri psixoloji stressdir. Cinsiyyətə görə aparılan abortları ailədə daha çox kişilər tələb edir. Düzdür, bəzən qadınların özlərinin də bu cür istəyi olur. Amma bu, əsasən kişilərin təsiri ilə olur.